歷史除咗殘酷，仲有光輝嘅人性同正義。之前提到德國商人舒特拉於二戰期間拯救唔少猶太人，除咗佢，二戰期間仲有位好值得尊敬嘅人，為救猶太人不遺餘力，佢就係被聯合國稱為「中國舒特拉」嘅何鳳山。
1938年納粹德軍侵佔奧地利，當時超過十八萬猶太人住响維也納，唔少人被捉去集中營，命運堪虞。納粹德軍規定，只要猶太人持有他國使館嘅入境簽證，上繳財產就可以離開奧地利，所以大批猶太人紛紛走去使館，包括17歲嘅Eric。Eric去咗五十間大使館，多數都係無證可發，直至第五十一間，搵到何鳳山。何鳳山問Eric要幾多個簽證，Eric講咗全家嘅人數：「20個。」何鳳山話：「將所有護照拎嚟，我全部幫你簽。」救得一命得一命，佢救咗好多個家庭，亦點燃無數人嘅生存希望。

講返何鳳山，佢曾經到德國慕尼黑留學，係政治經濟學博士，1938至1940年出中國駐維也納總領事，當時佢向猶太人發放到中國上海嘅簽證，幫助猶太人逃離納粹魔掌。根據資料，總領館總計向四千個猶太人發放簽證，加上受惠嘅猶太人子女等，估計成千上萬猶太人因此換嚟一線生機。
不過何鳳山嘅舉動引起納粹不滿，當局借口話中國駐維也納領事館間屋係猶太人財產而沒收咗，何鳳山因此自費租咗套小公寓辦公，繼續發放簽證，直至1940年被調離維也納。
何鳳山嘅女兒講過，「當時納粹只關注猶太人有無去處，而簽證係最好證明，好多猶太人拎到上海簽證之後，轉去其他地方避難。」何鳳山對自己嘅所做嘅事並無大肆宣揚，七百頁回憶錄入面只有唔夠一百個字提到相關經歷，直到佢逝世後先被公諸於世。以色列前總理沙龍曾經評價何鳳山：「他不是英雄，也不是天使，他是上帝」。